Unha mañá de chuvia coma a do reflexivo sábado día 9, de novembro, non impediu que o salón de actos do Centro Social de Afundación, en Vigo, se enchera até a bandeira. Tiven a oportunidade de asistir xunto, con Antón Alonso, Director de esta revista, Vinos y Caminos e outros grandes amigos, onde pudemos comprobar o grandísimo poder de convocatoria que teñen "Os Premios da Crítica de Galicia", e unha cita inexquecivel para encontrarse con persoas do "Mundo da Cultura" chegadas de moitos recunchos, pobos e cidades de Galicia, e alem de ela.
Este ano Os Premios da Crítica de Galicia, mudaron de lugar e de formato. Esto supón un acerto para os organizadores que levan 42 anos renovándose e potenciando a cultura da nosa terra. Este xa é un dos obxectivos conseguidos coa convocatoria destes premios.
Baixo o lema elexido polos organizadores “Teñamos o valor de darnos o futuro” do poeta Manuel A. Torneiro, quedou moi claro que a Terra e a Fala faise coa xente, cos artistas, científicos, poetas e escritores, expertos en gastronomía e con todo o potencial humano que ten este país galego.
Tanto Bieito Ledo coma Antón Pulido, presidente e vicepresidente, respetivamente, da Asociación Premios da Crítica Galicia, non pretenden complicarse a vida nun escenario político incerto, complexo, inestabel e devorador. Eles son dúas fontes inagotábeis de xenerosidade e exemplo de traballo ben feito. Detrás, ou a carón deles, todo un elenco de 26 membros que completan a Xunta Directiva da nomeada “Asociación de Premios Crítica de Galicia” para os que van os meus parabéns por lograr manter estes 42 anos de existencia.
Cartel onde se pode apreciar a inconfundible paleta do mestre Antón Pulido
Entrando en materia pódolles dicer que o acto comenzou co intervención de Bieito Ledo, que foi o encargado de abrir o acto saudando os asistentes e lembrando a trayectoria dos premios, que discurriu nun ambiente de concordia, orde e moita emoción. Non faltou a boa música do curioso Cuarteto Caramuxo. A singularidade deste grupo ven de seu, polas pezas que interpretan con maestría e os arranxos concebidos desde a música galega. Tamén nos enche de curiosidade que son un cuarteto formado por seis músicos. Dous clarinetes, un acordeón diatónico, un clarinete contrabaixo, un clarinete baixo e percusión de caixa e prato, que foron o fío conductor de cada apartado da escaleta prevista. Por outra parte, os tempos dedicados aos discursos dos premiados foron breves e non resultaron pesados. Tamén houbo un bo equilibrio entre os homes e as mulleres galardonadas, recoñecendo no caso delas, que a súa visualización social non deberá ser eclipsada por ninguén. Desta forma, os 8 xurados formados por sete membros cada un, cumpliron o seu difícil cometido de decidir entre tantos candidatos de prestixio, e xustificaron en cada caso o motivo que lles levou a decidirse polos premiados, por unanimidade.
Cuarteto Caramuxo, durante a sua participación nos Premios da Crítica Galicia 2019
Finalmente houbo unha degustación de productos galegos, onde os asistentes tivemos oportunidade de saudarnos, falar, sacar fotos e selfies e sobre todo conversar. Cada detalle estaba coidado e as botellas de viño tiñan un poema do querido Manuel María.
Ao día seguinte souben que houbo diversas opinións sobre o fermoso acto do que lles estou a falar. Pode ser que algún falase de ouvidas, do que lle contaron, ou que non teña liberdade para escreber sen prexuicios o que se alí se viviu. Quen sabe?. Só sei que o Alcalde de Vigo, Abel Caballero, fechou o acto cun discurso entrañabel que agradou aos asistentes, mantendo a solemnidade que reinou desde o comezo da entrega dos premios. Só tiven pena de non poder dicerlle que viñese para Ourense, pois gostaríanos ter un Alcalde que atendera aos vecinos, á cultura e á mellora da cidade, xa que o que nos tocou so pensa en “rañar o ceo” cun edificio. Xa me entenden. E pensándoo ben, quizáis fose mellor así, pasar sen lle dicer nada, para que fique no noso maxín un sábado entre novos e vellos amigos que traballan para que o noso país non baixe nunca do máis alto conceito de excelencia, coherencia e humildade.
Comentarios